有個微胖阿叔入嚟睇腸胃。佢上一份工壓力好大，所以成日食嘢搞到而家肥咗。近呢幾個月佢努力減肥。
不過佢減肥嘅方法好得意。佢話儘量拖到最夜先至食嘢。另外佢唔食肉轉左食好多好多蕃薯。
阿叔嘅減肥方法係錯嘅。女士通常減肥都係終身事業，所以我哋Naturally知識應該都會好過啲阿叔。
通常建議食嘢就唔會係越夜越好。最好少食多餐，等你容易有飽肚嘅感覺。每一餐亦都唔使食得太豐富。如果你有胃酸倒流嘅情況，夜晚果餐好近瞓覺嘅話，胃酸仲會嚴重啲。
佢其實入嚟問點解個肚成日咕嚕咕嚕咁呢成日會放屁。我問佢有冇睇叮噹，靜儀成日食番薯搞到放屁好尷尬。佢仲話揀啲最甜嘅番薯黎食，其實糖分超級高，你想減肥都難。
希望佢真係成功減到肥。不過我都減咗十幾年，所以都係食多啲好嘢算啦，哈哈哈！
～～～
完全唔關診所事嘅長篇得啖笑之奇怪教琴老師：
話說親戚想比4歲小朋友趁暑假時試吓學琴，睇下佢有冇興趣學落去。朋友介紹搵咗一個後生女黎教。佢一黎就收咗四堂嘅錢。
第一堂已經遲到一個鐘。之前唔做準備唔搵定點樣去佢屋企，Google Map其實會教你。人哋住市區又唔係乜嘢山旮旯地方。遲咗到先打黎問路？！
之後想約佢第二堂竟然約成個月先約到，暑假都過咗一大半。臨時臨急要改時間。成日就係屋企等佢，同等師傅上嚟裝寬頻有咩分別？
第二堂上完一肚氣。佢搭的士上黎話冇帶銀包要親戚落去俾錢。親戚屋企冇其他大人，一個人要湊住兩個細路落去幫佢俾的士錢。
算。
小朋友同佢上幾個字就冇興趣。自問小朋友都算乖，平時成日上開課外活動。唔係啲冇禮貌乞人憎嘅小朋友。
老師唔諗辦法氹小朋友，佢竟然就咁放棄，同個家長講話咁樣落去冇乜Point。佢話唔明點解咁細個就要學琴。又話自己已經八級琴，但係都冇咁細個開始學。我想講八級琴有乜咁巴閉？我同我親戚都八級琴，就好似而家一街都係大學生咁普遍。同埋有乜話細唔細個？你有冇見過怪獸家長要更細嘅細路學百般武藝？你唔想教咁細個就好接呢份工。
跟住佢竟然話你知唔知我去你屋企來回要三個鐘，同埋我收呢個友情價已經非常之平？小姐，你係知道地址，知道價錢，知道教乜嘢歲數嘅小朋友你先接呢份工。你要埋怨唔該你自己同朋友Bitch。你對住個客咁樣講你有冇腦？
親戚最後請咗佢走，因為唔想同佢理論同埋根本溝通唔到。最頂癮係老師WhatsApp返親戚話影咗小朋友上堂條片俾佢睇。話佢問過小朋友攞Oral Consent。個小朋友四歲，你問佢攞Consent？你係咪應該問過家長或監護人？係咪即係話呢如果你想性騷擾個小朋友，個小朋友話OK你就照樣可以搞？你是冇腦的嗎？
佢話影黎做證據話比個家長聽其實係個小朋友冇興趣上堂。即係你那賴個小朋友，而唔係因為你自己冇本事引起佢嘅興趣？個親戚係隔離房聽住，駛乜你影條片俾佢。小朋友10分鐘之後過嚟搵返阿媽話唔想上，咁已經代表冇興趣啦！洗鬼你拍片？
呢個唔知90定00後嘅老師仔就好似我平時喺診所睇開個啲病人。佢哋睇我冇禮貌，第時出到去做嘢就係咁。處處碰着釘但係唔知點解。我親戚已經算好脾氣嗰種。比着你遇上有錢住半山嘅怪獸媽咪，你覺得你咁講唔會俾人兜巴星咩？
祝你好運。我唔會袋錢入你袋，唔會教你做人道理。剩低果兩堂錢當送俾你。你要好似工人博炒呃一個月糧我都冇辦法。但係你咁樣接得幾多單生意？兩單三單都係咁，你個朵臭晒就冇人會再請你。同埋唔好同我講乜嘢行規，唔好同我講收咗錢都唔會退番。我有好朋友做演藝做教琴呢一行，佢哋話俾我聽唔係行規。你教得差貨不對辦就應該要退錢。
～～～～
仲睇到呢度嘅讀者，獎勵你請你眼睛食Donut🤣🤣🤣🤣
Search